कोसीटप्पु, सुनसरी
कोसीटप्पु वन्यजन्तु आरक्षका सिमसार सुक्न थालेसँगै यहाँको पारिस्थितिकीय प्रणालीमा प्रत्यक्ष असर देखिएको छ । पानी अभावमा नहर सुकेपछि किसानले नयाँ बाली लगाउन पाएका छैनन् । यहाँका सिमसार रामसार क्षेत्रमा सूचीकृत छन् ।
आरक्ष उत्तरतर्फ राजावासमा भारतले स्पर बनाएर नदी पश्चिमतर्फ मोडेपछि पूर्वी भागका सिमसार तथा पोखरी सुक्न थालेको आरक्षका प्रमुख वार्डेन रामदेव चौधरीले बताए । ‘पानीको एकुफर परिवर्तन भएपछि सिमसार सुक्न थालेका छन्, पानी रिचार्ज हुन छाडेको छ,’ उनले भने ।
सिमसार सुक्न थालेपछि जलीय प्रणालीमा असर पुगेको फ्रेस वाटर इकोलोजिस्ट एवं काठमाडौं विश्वविद्यालयकी अनुसन्धाता रामदेवी तचामोले जानकारी दिइन् । उनका अनुसार विभिन्न प्रजातिका माछा, कछुवा, शंखे किरा, सर्पलगायत पानीमा आश्रित जीव प्रभावित भएका छन् ।
